Каментары спецыялістаў

Ці будзе з'яўляцца парушэннем пункта 2 часткі 4.1 артыкула 4 ТР МС 022/2011 і пункта 80 раздзела 12 ТР МС 033/2013 частковае нанясенне наймення малочнай прадукцыі на вонкавым боку ўпакоўкі толькі на беларускай мове (смятана, кефір і інш.) пры нанясенні яе поўнага наймення на рускай і беларускай мовах на адваротным боку ўпакоўкі? У адпаведнасці з тэхнічным рэгламентам Мытнага саюза «Харчовая прадукцыя ў частцы яе маркіроўкі» (ТР МС 022/2011) прадугледжаная пунктам 1 часткі 4.1 артыкула 4 і нанесеная ў выглядзе надпісаў маркіроўка ўпакаванай харчовай прадукцыі павінна быць прыведзена на рускай мове і на дзяржаўнай (ых) мове (ах) дзяржавы – члена Мытнага саюза пры наяўнасці адпаведных патрабаванняў у заканадаўстве (ах) дзяржавы-члена (дзяржаў-членаў).
Што тычыцца патрабаванняў пункта 80 ТР МС 033/2013, то для малочных і малочных састаўных прадуктаў дапускаецца частковае нанясенне наймення на зручным для прачытання боку ўпакоўкі пры ўмове нанясення поўнага наймення на гэтай жа ўпакоўцы.
Разам з гэтым варта звярнуць увагу, што фармат паказвання на пярэднім боку ўпакоўкі частковага наймення толькі на беларускай мове не адпавядае патрабаванням пункта 2 часткі 4.1 артыкула 4 ТР МС 022/2011 і п. 95 ТР МС 033/2013 пры рэалізацыі такой прадукцыі ў дзяржавах – членах ЕАЭС. Такі фармат можа быць выкарыстаны пры рэалізацыі прадукцыі толькі на тэрыторыі Рэспублікі Беларусь. 03.06.2024 / Ільянкова В.Ф

Якім дзяржаўным стандартам (СТБ) можна карыстацца пры вызначэнні пераліку работ па рамонце smart-тэлевізараў? У Рэспубліцы Беларусь адсутнічаюць стандарты, якія вызначаюць пералік названых работ.
Такі пералік можа быць вызначаны вытворцам (вырабляльнiкам) тэлевізараў або рамонтнай арганізацыяй. 03.06.2024 /Ільянкова В.Ф.

Калі адным з кампанентаў, якія ўваходзяць у састаў катлет (паўфабрыкатаў), з'яўляюцца паніровачныя сухары, то ці неабходна адзначаць іх поўны кампанентны састаў? У адпаведнасці з пунктам 2 часткі 4.4 артыкула 4 ТР МС 022/2011 «Харчовая прадукцыя ў частцы яе маркіроўкі» ў выпадку, калі масавая доля састаўного кампанента складае 2 працэнта і менш, дапускаецца не адзначаць кампаненты, якія ў яго ўваходзяць, за выключэннем харчовых дабавак, араматызатараў і харчовых дабавак, якія ўваходзяць у іх састаў, біялагічна актыўных рэчываў і лекавых раслін, кампанентаў, атрыманых з прымяненнем ГМА, і кампанентаў, названых у пункце 14 часткі 4.4 гэтага артыкула.
Калі ў саставе катлет (паўфабрыкатаў) сухары складаюць 2 працэнта i менш і не змяшчаюць вышэйпаказаных інгрэдыентаў, то ў такім выпадку можна не адзначаць іх састаў. 03.06.2024 / Ільянкова В.Ф.

Чула, што ў правілы маркіроўкі харчовай прадукцыі знакам «Натуральны прадукт» унесены змяненнi. Што яны закранулi, калі гэта так? З 1 снежня 2022 г. у ТКП 126-2016 «Харчовая прадукцыя. Правілы маркіроўкі знакам "Натуральны прадукт". Асноўныя палажэнні» ўведзены некаторыя змяненнi. Іх распрацоўка ажыццяўлялася ў сувязі з рэалізацыяй у нашай краіне заканадаўства аб вытворчасці і абарачэннi арганічнай прадукцыі, з'яўленнем новых тэхналогій, а таксама набытай практыкай прымянення.
Перш за ўсё адзначу сістэматызацыю патрабаванняў да сыравіны расліннага і жывёльнага паходжання, якая выкарыстоўваецца для вырабу натуральнай прадукцыі. Гэта дазволiць больш дакладна размежаваць дадзеную прадукцыю і арганічную. Адпаведна, пашырыўся камплект доказных дакументаў, якія аддаюцца прадпрыемствам-заяўнікам.
Таксама прадукцыя расліннага паходжання павінна быць вырашчана ў натуральных умовах, без прымянення гiдрапоннай вытворчасці. Увядзенне такога абмежавання для натуральнай прадукцыі абумоўлена тым, што дадзены спосаб атрымлівае ўсё большае распаўсюджванне, дазваляючы вырошчваць расліны без глебы, з выкарыстаннем розных матэрыялаў для падтрымкі іх каранёў.
З'явіўся новы крытэрый аднясення прадукцыі да натуральнай. У дапаўненне да ўжо дзеючых яна павінна быць выраблена без прымянення нанатэхналогій.
Такім чынам, праект «Натуральны прадукт» кiруецца сваёй місіяй – фармiраваннем класа прадукцыі палепшанай якасці. Цяпер у Беларусі дзейнічае 129 сертыфікатаў на розныя віды харчовай прадукцыі, выдадзеных 43 айчынным вытворцам.
Дарэчы, па такім шляху ідуць і некаторыя краіны СНД, у прыватнасці ў Расійскай Федэрацыі ў сярэдзіне мінулага года прыняты закон аб сельскагаспадарчай прадукцыі, сыравіне і харчаванні з палепшанымі характарыстыкамі. 26.01.2023 / Скарына Л.М.

Ці неабходна паказваць у маркіроўцы шматкампанентнай харчовай прадукцыі прыдуманыя назвы харчовых інгрэдыентаў, якія ўваходзяць у яе састаў, напрыклад, жывёльны бялок «Кароўка» ці інулін «Васілёк»? Згодна з пунктам 4 часткі 4.4 ТР МС 022/2011 «Харчовая прадукцыя ў частцы яе маркіроўкі» найменне кампанента, які прадстаўляе сабой харчовы прадукт, паказваецца ў саставе харчовай прадукцыі ў адпаведнасці з патрабаваннямі часткі 4.3. Найменне харчовай прадукцыі, паказанае ў маркіроўцы, павінна дазваляць адносіць прадукцыю да харчовай прадукцыі, дакладна яе характарызаваць і адрозніваць ад іншай харчовай прадукцыі. Прыдуманая назва харчовай прадукцыі (пры наяўнасці) павінна быць уключана ў найменне харчовай прадукцыі і размешчана ў непасрэднай блізкасці ад яго.
Такім чынам, прыдуманую назву неабходна паказваць у маркіроўцы харчовых інгрэдыентаў шматкампанентнай харчовай прадукцыі. 26.01.2023 / Скарына Л.М.

Пад дзеянне якіх тэхнічных рэгламентаў Мытнага саюза падпадаюць лесавозныя паўпрычэпы з маніпулятарам? Трактарныя прычэпы і паўпрычэпы з'яўляюцца аб'ектам ТР МС 031/2012 «Аб бяспецы сельскагаспадарчых і лесагаспадарчых трактароў і прычэпаў да іх».
У адпаведнасцi з галiной прымянення дадзены тэхнiчны рэгламент распаўсюджваецца на колавыя і гусенічныя сельскагаспадарчыя і лесагаспадарчыя трактары, што вырабляюцца i ўвозяцца, і прычэпы да іх, якія выпускаюцца ў абарачэнне ў ЕАЭС, незалежна ад краіны паходжання.
Пры гэтым у адпаведнасці з пунктам 2 артыкула 1 ТР МС 031/2012 не распаўсюджваецца на прычэпы спецыяльнага назначэння.
У адпаведнасці з азначэннем, прыведзеным у артыкуле 2, да прычэпаў спецыяльнага назначэння адносяцца прычэпы, якія адпавядаюць адной або некалькім умовам:
– прычэп не прызначаны для ўдзелу ў дарожным руху без дадатковых мер забеспячэння бяспекі дарожнага руху, прадугледжаных вытворцам;
– прычэп складаецца з шасі прычэпа і няздымнага спецыяльнага абсталявання, якое забяспечвае перавозку толькі пэўных відаў грузаў (адкрытых платформ для перавозкі рулонаў і цюкоў сена і саломы, прычэпаў для перавозкі жывёл, птушкі, сіласнай і сянажнай масы і інш.);
– на прычэпе ўстаноўлена пагрузачна-разгрузачнае і (або) спецыяльнае абсталяванне, прызначанае для выканання пэўных тэхналагічных працэсаў і аперацый (напрыклад, аўтаномныя рубілкі). Пры гэтым адначасова або дадаткова могуць выконвацца работы па перавозцы грузаў.
Да прычэпаў спецыяльнага прызначэння таксама адносяцца прычэпы, якія адпавядаюць аднаму або некалькім названым умовам, і пры гэтым частка вертыкальнай нагрузкі перадаецца буксіруючаму трактару (паўпрычэпы спецыяльнага прызначэння).
З гэтага вынікае, што лесавозныя паўпрычэпы адносяцца да прычэпаў спецыяльнага прызначэння і не падпадаюць пад дзеянне ТР МС 031/2012.
Лесавозныя паўпрычэпы, у тым ліку з устаноўленым на іх пагрузачным абсталяваннем, адносяцца да машын і абсталявання лесанарыхтоўчым у адпаведнасці з ДАСТ 12.2.102-2013, уваходзяць у вобласць прымянення ТР МС 010/2011 «Аб бяспецы машын і абсталявання» і падлягаюць дэклараванню адпаведнасці. 08.12.2022 / Шавель С.В.

Згодна з якiмi нарматыўнымi дакументамi павiнны праводзiцца зварачныя аперацыi з выкарыстаннем кандэнсатараў, у прыватнасцi кандэнсатарная зварка крапяжу? У цяперашні час у Рэспубліцы Беларусь на працэс кандэнсатарнай прываркі крапяжу распаўсюджваецца СТБ ISO 14555-2009 «Зварка. Дугавая прыварка металічных шпілек». Умоўная адзнака працэсу зваркі прыведзена ў СТБ ISO 4063-2012 «Зварка і роднасныя працэсы. Пералік і ўмоўныя адзнакi працэсаў», тэрмін і адпаведнае азначэнне прыведзены ў СТБ ISO 857-1-2004 «Зварка і роднасныя працэсы. Слоўнік. Частка 1. Працэсы зваркі металаў». 08.12.2022 / Шавель С.В.

Цi можна замест сертыфiката адпаведнасцi на тавар атрымаць дэкларацыю аб адпаведнасцi, нават калi ў самым тэхнiчным рэгламенце ТС (ЕАЭС) зазначана, што дадзеная прадукцыя падлягае сертыфiкацыi па той або iншай схеме? Адносiны ў галiне ацэнкi адпаведнасцi регулююцца Законам Рэспублiкi Беларусь «Аб ацэнцы адпаведнасцi тэхнiчным патрабаванням i акрэдытацыi органаў па ацэнцы адпаведнасцi» (далей – Закон) i iншымi актамi заканадаўства, мiжнародна-прававымi актамi, якiя складаюць права Еўразiйскага эканамiчнага саюза (далей – Саюз).
Адпаведна пункту 11 артыкула 30 Закона, вытворца або ўпаўнаважаная вытворцам асоба альбо прадавец (пастаўшчык) мае права замест дэкларавання адпаведнасцi прадукцыi выбраць правядзенне сертыфiкацыi гэтай прадукцыi, калi такая магчымасць прадугледжана тэхнiчным рэгламентам Рэспублiкi Беларусь, альбо нарматыўным прававым актам Прэзiдэнта Рэспублiкi Беларусь або iншым прававым актам у адпаведнасцi з вызначаным iм парадкам, якi прадугледжвае ўвядзенне абавязковага пацвярджэння адпаведнасцi ў сувязi з неабходнасцю прыняцця мер дзяржаўнага рэгулявання, альбо тэхнiчным рэгламентам Саюза (Мытнага саюза). У гэтым выпадку дэклараванне адпаведнасцi замяняецца абавязковай сертыфiкацыяй.
Такiм чынам, правядзенне дэкларавання адпаведнасцi замест абавязковай сертыфiкацыi немагчыма. 14.09.2022 / Ільянкова В.Ф.

Цi падлягаюць дэклараванню адпаведнасцi батуты каркасныя (спружынныя) з дапушчальнай нагрузкай ад 100 да 180 кг з ахоўнай сеткай? У залежнасцi ад галiны прымянення батуты (у адпаведнасцi з эксплуатацыйнымi дакументамi вытворцы) могуць быць прызначаныя для актыўнага адпачынку пры дамашнiм выкарыстаннi дзецьмi. У дадзеным выпадку яны ўваходзяць у галiну прымянення тэхнiчнага рэгламента Мытнага саюза «Аб бяспецы цацак» (ТР ТС 008/2011) i падлягаюць сертыфiкацыi.
У выпадку, калi батуты (у адпаведнасцi з эксплуатацыйнымi дакументамi вытворцы) аднесены да атракцыёнаў, то яны ўваходзяць у галiну прымянення тэхнiчнага рэгламента Еўразiйскага эканамiчнага саюза «Аб бяспецы атракцыёнаў» (ТР ЕАЭС 038/2016). У залежнасцi ад бiямеханiчных уздеянняў, якiя аказваюцца на пасажыраў, i ступенi патэнцыйнай бiямеханiчнай рызыкi, могуць падлягаць абавязковай сертыфiкацыi (RB-1) або дэклараванню адпаведнасцi (RB-2, RB-3).
Калi батуты прызначаны для заняткаў фiзiчнай культурай i спортам, то ў цяперашнi час яны не падлягаюць абавязковаму пацвярджэнню адпаведнасцi. Аднак дадзеныя батуты павiнны быць бяспечнымi i адпавядаць тэхнiчным патрабаванням у адпаведнасцi з тэхнiчнай дакументацыяй на iх. 14.09.2022 / Ільянкова В.Ф.